संत चोखामेळा - श्रीमुखाची शोभा कस्तुरी

Share

 संत चोखामेळा - श्रीमुखाची शोभा कस्तुरी.

श्रीमुखाची शोभा कस्तुरी मळवट । उभा असे नीट विटेवर ॥१॥
कर दोनीं कटीं कुंडल झळकती । तेज हे फाकती दशदिशां ॥२॥
वैजयंती माळा चंदनाची उटी । टिळक लल्लाटीं कस्तुरीचा ॥३॥
चोखा म्हणे माझ्या जीवींचा जीवनु । पाहतां तनु मनु भुलोनी जाय ॥४॥


संत चोखामेळा - अनादि निर्मळ वेदाचें ज...

अनादि निर्मळ वेदाचें जें मूळ । परब्रह्म सोज्वळ विटेवरी ॥१॥
कर दोन्ही कटीं राहिलासे उभा । नीळवर्ण प्रभा फांकतसे ॥२॥
आनंदाचा कंद पाउलें साजिरीं । चोखा म्हणे हरी पंढरीये ॥३॥



संत चोखामेळा - गोजिरें साजिरें श्रीमुख...
  

गोजिरें साजिरें श्रीमुख चांगलें । ध्यानीं मिरवलें योगीयांच्या ॥१॥
पंढरी भुवैकुंठ भिवरेच्या तीरीं । वैकुंठाचा हरी उभा विटे ॥२॥
राई रखुमाई सत्यभामा नारी । पुंडलिकें सहपरिवारीं आणियेला ॥३॥
वैजयंती माळ किरीटकुंडलें । प्रेमें आलिंगिलें चोखियानें ॥४॥

संत चोखामेळा - व्यापक व्यापला तिहीं त...


 व्यापक व्यापला तिहीं त्रिभुवनीं । चारी वर्ण खाणी विठू माझा ॥१॥

शंख चक्र करीं वैजयंती माळा । नेसला पिवळा पितांबर ॥२॥
कटावरी जेणें कर हे ठेविले । ध्यान मिरविलें भीमातिरीं ॥३॥
चोखा म्हणे माझा आनंदाचा कंद । नाम हे गोविंद मिरविलें ॥४॥


संत चोखामेळा - अनाम जयासी तेंचि रुप ..
 

अनाम जयासी तेंचि रुप आलें । उभें तें राहीलें विटेवरी ॥१॥
पुंडलिकाच्या प्रेमा युगें अठ्‌ठावीस । समचरणीं वास पंढरीये ॥२॥
चोखा म्हणे ऐसा भक्तांचा कनवाळू । जाणें लळा पाळू भाविकांचा ॥३॥